سكر و زيت وشوية فتافيت: جمعة النصر وياله من نصر

جمعة النصر وياله من نصر

الله عليكى يامصر واخيرا شوفتى النصر.... يااجمل واعرق واحسن بلد فى الدنيا كلها..
بجد احتفال جمعة النصر كان احتفال رائع بكل المقاييس ..كل الناس فرحانة ،كل الناس مبسوطة...
الناس بتضحك بعد ماالضحكة غابت عن وجوههم بعد غياب...الدنيا كلها مزقططة...
الصواريخ اللى ملت سماء ميدان التحرير والهتافات والضحك اللى اختلط بالدموع على الشهداء..
ياريتهم كانوا معانا وشافوا النصر اللى حققوه ..دمكم مارحش هدر ..اكيد بتتفرجوا وحاسين بينا..
الله يرحمكم ويصبر اهاليكم عمر التاريخ ماهينساكم...عمرنا ماهننساكم ....
لازم اساميهم تبقى فى كل شارع ومستشفى وميدان،لازم اسامى الناس اللى ماتستحقش تبقى موجودة تتشال ويتحط بدالها اسامى الناس الشرفاء اللى ضحوا بنفسهم علشان مصر تعيش حرة،عايزين نشيل كل اسامى سوزان وحسنى مبارك مش عايزين حاجة تفكرنا بهم...

مش عايزين حاجة تفكرنا بعصرهم الاسود وتاريخهم اللى مليان فساد ودم.... عايزين نفتكر بس اخواتنا وولادنا اللى استشهدوا علشان الاجيال الجاية تعيش حرة..كريمة..

وبجد جمعة النصر مافيش كلمة توصفها ....الناس كلها كانت بتحمى بعضها ..اتصوروا اما يكون فى ملايين بتحمى بعضها....الولاد بيحموا البنات وكأنهم اخواتهم...والناس بتحمى الاطفال وكأنهم اولادهم..احساس جميل افتقدناه لسنين.... الله عليكى يامصر

وكمان الناس نزلت مش بس علشان الاحتفال وتكريم الشهداء ،لا وعلشان لسه فى مطالب كتير ماتحققتش ماحدش هيقدر ينسى الشباب اللى لسه معتقلين لحد الان... وحرقة قلب اهاليهم عليهم..وده اهم مطلب لازم الاف المعتقلين يطلعوا مش بس 239 ..لازم فرحتنا تبقى كاملة وهتكمل بوجودهم جنبنا

وكان من المطالب الاعفاء عن الضابط احمد شومان البطل اللى انضم للمتظاهرين وترك سلاحه مع اصحابه وعدم محاكمته محاكمة عسكرية..بس الحمد لله النهاردة تم التحفظ على التحقيق..الف مبروك يابطل والله انت انسان رائع فوق الوصف ووطنى وقبل كل ده انت مصرى على حق الف تحية لك..

ومطلب اسقاط حكومة احمد شفيق..بس انا ليا رأى فى الموضوع ده احمد شفيق رجل محترم وملتزم وده باين من تصريحاته وكلامه وكمان بصماته الواضحة اللى تركها فى مصر للطيران بس احنا مش بنعترض على شخصه احنا بنعترض على وجود بعض الوزراء فى حكومته اللى بينتموا للحزب الوطنى والمعروفين بفسادهم لحد الان ..ليه مايتغيروش لناس محترمة اكتر وبتحب بلدها...

يحسب لحكومة شفيق تعيين الشاعر العظيم فاروق جويدة لوزراة الثقافة النهاردة بجد احنا نفسنا فى تغييرات زى دى..تغييرات ملموسة نحسها..نبضها يوصل لقلب الشارع المصرى،يارب نشوف الحكومة المناسبة فى المكان المناسب والوقت المناسب..

واحسن خبر المصريين سمعوه إحالة احمد عز والعادلى والمغربى وجرانة الى سجن طره على ذمة التحقيق وانا هتتطرق للموضوع ده بالتفصيل ان شاء الله لانه موضوع يطول فيه الحديث ..الف مبرووووك يامصريين....
والله وعملتوها يارجالة..ورفعتم راس مصر بلدنا